20 gennaio 2004 Nu criatore scriato R’ ’a mana smerza a cchella deritta, ’o criatore Canzanella e appriesso Mimmo Liguoro, Sergio Cola e Amedeo Messina

Tuorno tuorno è ttutto nu ciùciù ca nun ce stà cchiù religgione e pe tramente se ne vere e se ne sente p’ogni ppizzo. Forze pure troppa. Chiese, sinagoche e muschee stanno chiene r’ ’e bizzuoche lloro. Prievete, rabbine e mmullà fanno prereche e cumizzie mmiez’â via e int’a tivvù. E, mmece ’e scumparì, ogni ttanto nasce purzì na religgione nova. Ma nisciuno s’è addunato ca nseggillo ’e rezza mo tenimmo n’atu pataterno. Nun ve ne site accuorte? Cher’è, nun me crerite? E gghiatelo a vveré vuie stesse ncopp’ô sito r’ ’A mmasciata, ch’è comme si fosse na scrittura sacra soia. (Ve rico ncunferenzia ca n’amico m’ha fatto venì a mmente c’ammasciata bbona è traduzzione r’ ’o vangelio). Tutt’a nu tratto è asciuto n’atu criatore e ha revelato ’o nomme suio: Massimiliano Canzanella. E avit’assapé ca paricchie r’ ’e pecuozze suie so’ cumminte ca l’uriggene r’ ’o nomme è ll’accareco Kanzu’el, val’a ddicere ’o ddio r’ ’o ggrano, canasciuto pure addu ll’etrusche comme Canzate.
Sitariello e ggiurnaletto ranno ’o nomme r’ ’o direttore, r’ ’e redatture, r’ ’o grafeco, e ppo r’ ’o criatore lloro. Siccomme addó ce stà ’o criatore nce hanno stà pure ’e ccriature, vuie ve spiate: neh! stu Canzanella c’ha criato? He ritto schiatta! Tanto p’accummencià ha fatto ascì ’A mmasciata. E ve pare niente? Aggio capito ’antifuna. Vuie site scenziate fute e mm’appunite ca nu criatore overo ’e ccose ’e ffà cu nniente. E i’ v’arresponno ca nu cunto è crià, e n’ato è pruducere, si no sarriamo criature tutte quante. Nquant’a cchesto, nun avite tuorto, ma ce stà na criazzione ca vò ricere nu frutto ’e fantasia senza niente avé a che ffà c’ ’o munno e ’a storia overa, comm’a chi s’ammenta ’e ccose sulo c’ ’a mmaggenazzione soia. Cundicenno ’a verità, comme penzate ’e puté abbencere ’o criatore Canzanella int’a chest’arte? ’O ssaccio, nun me ne scordo. Site uommene e femmene ’e scienzia, e pe bbuie ce vonno scanaglie, spremmiente e pprove. Embè, so’ lliscio pe bbuie e qquante ne vulite, ca so’ cepolle!
Comme accummencia ll’Enuma Elish? V’allicurdate? ’O primmo verzo r’ ’a cchiù antica e llonga verzione epeca r’ ’a criazione ’e ll’annevierzo, scritta nu quattemila anne fa, rice: «Quanno â via ’e coppa ’e ciele nun teneveno ancora nomme». Chesto signifeca c’ ’a primma cosa che te fa nu criatore è cchella ’e s’ammentà na lengua pe ddà nu nomme a uommene, animale, chiante e stelle. E accussì ha fatto pure Canzanella, crianno nu lenguaccio urigginale ca, mudesto comm’è isso, ha vuluto chiammà napulitano. Chi vo veré ’a putenza e ’a gloria soia ca stanno ncielo e nterra, comme riceno ’e pecuozze redatture r’ ’A mmasciata, ha dda sapé mettere â spartata ’o nnapulitano ’e Napule e cchillo ’e Canzanella. So’ ddoie cose ntutto differente. Ma nun perditeve ’e curaggio, pecché, comme riceva Hegel, ’o meglio masto è cchillu negativo. Scanaglianno arrure e differenze vuie putite mparà bbuono ’a lengua ’e ll’antenate vuoste o scegliere chella ’e ll’accademmia r’ ’e summiere arragliature. E cchesto abbasta a ve vattià accademmece, pecché lloro ’o chiammano esercizzio ’e libbero arbitrio.
Siconna criazzione ’e Canzanella è stata chella r’ ’a pruposta ’e legge appresentata c’ ’o nummero 2745 ’a ll’unnerevole Cola e Siniscalchi â Cammera r’ ’e deputate. Si vuie iate ncopp’ô sito ’e ll’accademmia nce putite leggere ch’è stat’isso a ppiglià chest’abbiata e ’a spiecazzione sott’â foto ’o fa passà nientemeno ca pe prufessore. Abbuso ’e titulo ca p’ ’e timmurate ’e Kanzu’el se spieca allicurdanno chillo ’e quanno spiarono a Cristo: «Sì ttu ’o messia?» e isso arrespunnette: «Sì ttu ca l’he ritto». Chiste songo ati dduie asempie ’e crià r’ ’o Canzanella. Abbasta nfatte ca vuie int’â rezza scrivite ’o nnerizzo www.interviu.it/avvenime/cultura/cultura009.htm e nce truvate c’ ’a pruposta fuie abbiata ’a dduie ’e lloro: Canzanella e Amedeo Messina. E ll’istessa cosa ve putarranno addicere sia Cola ca Siniscalchi, comme pure tutte chille che stevano ’o 25 ’e maggio 2002 ô cunvegno p’ ’a presentazzione. E si nun abbastasse, nuie ve rammo pe ssuvierchio ’a tale e qquale ’e chillu iuorno, addó stanno assettate, ienno r’ ’a mana smerza a cchella deritta, ’o criatore Canzanella e appriesso ll’aneme perze ’e Mimmo Liguoro, Sergio Cola e Amedeo Messina.
Ammo ggià scritto ’e Canzanella ch’è criatore r’ ’A mmasciata. Chesto va cuntanno e accussì s’ ’o ccrereno ’e bizzuoche suoie, ma ’e fatte so’ gghiute ’e n’ata manera e ’a carta canta ncannuolo. Fuie Amedeo Messina, sissignore, propio ’o presidente ’e ll’istituto nuosto, ca na sera r’ ’o 2001, a ppiere ’e tavulino addu Intra Moenia a cchiazza Bellini, ncumpagnia ’e Renato De Falco, Roberto d’Ajello, Gaetano Colonnese e dd’ ’o stesso Canzanella, rialaie stu nomme p’ ’o ggiurnale ca nzieme se penzava ’e pubbrecà stampannolo cu llengua napulitana. Pecché nun stanno cchiù mparanza? Pe bbia ca se mbriacarono ’e llengue. Fuie na Babbele. Mmeretà ’a corpa fuie ’e chisti bavalarde, ca nun ngarravano a lleggere e ccapì ’o ccanzanellisco. ’A verzione ca ne ranno ll’accademmece è però chella ca lloro, nun ricanuscenno comme criatore Canzanella e mmazzecanno ’o bbene e ’o mmale r’ ’o nnapulitano, ieveno ricenno c’ ’o ccanzanellisco era na lengua streveza e vvastarda. E accussì fuie ca sti aretece venettero sfrattate r’ô ciardino ’e ll’accademmia.
Pe cchiurere stu piezzo v’ammo ’a ricere ca simmo uommene ’e parola, ma no ’e chelle cunzacrate comme vierbe ’e ddio ’a Massimiliano Canzanella. Chi vò bbene a Nnapule e ô nnapulitano va scanzanno a cchisto comm’a pesta. Propio pe cchesto ’un ve chierimmo ’e agliottere buscie e si ve cuntammo fatte ve ne rammo pure documiente e pprove. Nce putite crerere, accussì, si ve ricimmo ca nuie turnarrammo a ve rà cunto ’e tutt’ ’e criazzione ’e ll’accademmia. P’ ’o mumento cunzigliammo a ognuno ’e vuie ’e stà bbuono attiento a cchello ca va scrianno stu criatore scrianzato. ’O spireto r’ ’o suio nun annareia ncopp’a ll’acque, ma s’abboffa ’e zifere ’e viento cu na lengua mmocca e nu rasulo ncanna. Sta religgione nova nciarma abbaie sulo pe chi vere ’a vecchia ncielo e ffa pecuozze mmiez’a chi nzerta cucche e franfellicche. Pe pparta nosta, sta recina ’e faveze accademmece ponn’ì mparanza a rrusecà lutamma e vvrenna, comme fanno ô ssoleto ’e summiere arragliature.