Raccoveta 'e penziere
mise a lengua nosta 'a Amedeo Messina

AMMORE

Dint'ê storie meie d'ammore na vota 'o scrupulo veneva roppo, mo' me vene apprimma - Ennio Flaiano

GUERRA
Purtaie àveta 'a bannera soia... accussì nun l'aveva 'a veré - Stanislaw Jerzy Lec

'E pòvere vanno â uerra, a cumbattere e murì p' 'e sfizzie, p' 'e rricchezze e p' 'o ssupierchio 'e ll'ate - Plutarco

LENGUA

Addó sta 'o munno ce sta pure 'a lengua. 'O munno nun è maie senza parole, è sulo int'â parola, e senz' 'a parola nun sarrìa cchiù niente - Franz Rosenzweig

Ntèrpetre: chi fa che ddoie perzone 'e lengua deverza se rièsceno a capì, repetenno a ll'uno e a ll'ato chello ca le fa cchiù commodo 'e sentì - Ambrose Bierce

Chi nun sape 'e llengue 'e ll'ate 'un sape niente r' 'a soia - Johann Wolfgang Goethe

Nu dezziunario è ll'annevierzo sano cu ll'ordene arfabbetico - Anatole France

A finale, 'a patria è 'a lengua - Camilo José Cela

'E stessi pparole, prununziate 'a vocche deverze, pigliano signifecate differente e cierti vote assaie cuntrarie - Alessandro Morandotti

'E tradutture songo comm' 'e pitture retrattiste, ponno abbellì 'a copia, ma sempe ha dd'assumiglià a ll'urigginale - Elie Freron

'E cunfine r' 'a lengua mia songo 'e cunfine r' 'o munno mio - Ludwig Wittgenstein

'A forza 'e na lengua nun cunziste int'ô rebbuttà chello ch'è furastiero, ma int'ô rennere r' 'o ssuoio - Johann Wolfgang Goethe

Migliurà 'o stile signifeca migliurà 'o penziero - Friedrich Nietzsche

Pe nu populo che ce stà cchiù 'e bello r' 'a lengua 'e ll'antenate?
- Johann Gottfried Herder

'O linguaggio è n'arte anonema, cullettiva e nconscia, 'o resultato r' 'a criatività 'e migliare 'e generazzione - Edward Sapir

'E traduzzione (comm' 'e mugliere) songo arraro fedele, si teneno quaccosa d'aggrazziato - Roy Campbell

MATREMMONIO

Arape bbuono ll'uocchie primm' 'e te spusà e nzierrele a mmiezo aroppo
- Benjamin Franklin

'O matremmonio è 'a causa prencepale r' 'o devorzio - Groucho Marx

'O devorzio 'e qualunque tipo è na repecchia ncopp'a quaccosa iuta acito. 'A battaglia p' 'o devorzio è na battaglia 'e retrovia. S'ha dda luttà contr' 'o matremmonio
- Luciano Bianciardi

MMERECINA

Nun dubbeto c' 'a mmerecina pozza servì a cierte uommene, ma rico ch'è nu uaio p' 'a specie umana - Jean-Jacques Rousseau

PACE

Nun so' sulo pacifista. So' nu pacifista militante. So' capace 'e luttà p' 'a pace
- Albert Einstein

N'ommo, chiunch'isso sia, vale cchiù 'e na bannera, quale ch'essa sia - Eduardo Chillida

PENZIERO

'E parole cchiù antiche e cchiù corte - 'sì' e 'no' - pretenneno 'o cchiù gruosso penzamiento - Pitagora

Refriette, primma 'e penzà - Stanislaw Jerzy Lec

Ogne penziero custetuisce n'eccezzione a na regula gennerale, chella 'e nun penzà
- Paul Valéry

'A rialtà 'e ll'ato nun sta int'a chello ca te cunfessa, ma int'a chello ca nun te pò cunfessà. Pirciò, si 'o vuò capì, nun stà a sentere 'e pparole che dice, ma chelle ca nun dice - Gibran Khalil Gibran

N'ommo cu na penzata nova è nu schirchio nfin'a quanno chella penzata nun trionfa - Mark Twain

PULITECA

È sulo ll'errore a tené besuogno r' 'o sustegno r' 'o guverno. 'A verità pò campà a pi essa - Thomas Jefferson

'A libbertà è sempe e sulamente 'a libbertà 'e chille c' 'a penzano 'e n'ata manera
- Rosa Luxemburg

'O uaio 'e stu paese è ca ce stanno troppe pulitece che se crerono, pe bbia 'e na cummenzione abbasata ncopp'â sperienza, ca sia pussibbele mbruglià a tutte quante e sempe - Franklin P. Adams

'A sinistra è nu uaio ca sulo 'a presenza r' 'a destra renne suppurtabbele
- Massimo D'Alema

REVOLUZZIONE

Quanno scarrupate 'e munumente, facite stà cuiete 'e pierestalle. Ponno sempe fà commodo - Stanislaw Jerzy Lec

Si vulimmo ch' 'e cose cagnano s'hanno 'a occupà 'e banche e fà zumpà 'a televisione. Nun è pussibbele n'ata suluzzione revoluzzionaria - Luciano Bianciardi